Shqipëri: Demokratët ia atribuojnë bllokimin krizës së PS-së, socialistët thonë se kompromisi pengohet nga ndërhyrja e qeverisë

Keida Kostreci 26-03-2006

Parlamenti i Shqipërisë mblidhet sërish të hënën pas disa javësh acarimesh që e kanë bërë të pamundur diskutimin dhe votimin për ligje të rëndësishme si ai i legalizimeve dhe moratoriumit për bllokimin e skafeve. Pas një paqeje të shkurtër që u duk se u arrit me shprehjen e vullnetit për kompromis për rregulloren, gjendja u tendos përsëri javën e kaluar. Në një intervistë për Zërin e Amerikës Kryetari i Grupit Parlamentar të Partisë Demokratike Bamir Topi dhe ai i grupit parlamentar të Partisë Socialiste Pandeli Majko, thanë se kompromisi është i nevojshëm, por nga komentet e tyre u la të kuptohet që secila palë pret që ndryshimi të vijë nga pala kundërshtare.

Zëri i Amerikës: Zoti Topi, nesër Parlamenti rifillon punimet pas një jave me acarime, në vazhdën e situatës së tensionuar politike. A pritet ndonjë ndryshim i klimës që do të bënte të mundur një debat të shëndetshëm për ligje të rëndësishme si ai i legalizimeve, pronave dhe moratoriumi për bllokimin e skafeve?

Bamir Topi: E vërteta është se mëse një herë unë dhe kolegët e mi të maxhorancës u jemi drejtuar kolegëve parlamentarë të spektrit të majtë që duhet t’i kthehen jetës parlamentare, debatit parlamentar për çështje mjaft të rëndësishme që kanë të bëjnë jo thjesht me një diskutim rreth problemeve të qeverisjes, sepse në parantezë them që opozita është në pozicionin e saj të natyrshëm kur kritikon qeverinë dhe qeverisjen, por është një element tjetër mjaft i rëndësishëm kur diskutohen ligje që kanë impakte të gjera publike. Fakti që ka më shumë se tre javë që spektri i majtë politik në parlament i është futur një lufte të pamotivuar për gjëra sipërfaqësore dhe ç’është më e rëndësishmja jashtë rregullores së Kuvendit tregon që ata në mënyrë të vullnetshme janë shkëputur nga debatet principiale, madhore që shqetësojnë aktualisht shoqërinë shqiptare dhe institucionet e Shqipërisë. Nga kjo pikëpamje unë them që nesër në parlament do të doja të shikoja një klimë tjetër në këtë auditor të rëndësishëm për të diskutuar rreth atyre problemeve që juve sa i cituat

Zëri i Amerikës: Zoti Majko, çfarë qëndrimi do të mbani juve në kushtet e nevojës për diskutimin e këtyre ligjeve?

Pandeli Majko: Unë shpresoj që sot publikimi i letrës të zotit Barroso drejtuar kryeministrit të Shqipërisë, me mesazhet përkatëse që i cituat edhe ju, mendoj që janë mesazhe që i takojnë të gjithë klasës politike shqiptare. Ne jemi të prirur që jo vetëm në emër të të thënit të parimit, por edhe të zbatimit praktik, e kemi kuptuar që momenti i integrimit të Shqipërisë në Bashkimin Evropian dhe NATO, pa diskutim kërkon një dialog politik dhe kompromis për gjëra që është e pakuptimtë të diskutosh alternativën e majtë, apo të djathtë. Megjithatë dëshiroj të them faktin që qëndrimi i opozitës së majtë, është qëndrim i pesë partive, është një qëndrim me të cilin tashmë janë bashkuar edhe tre parti të tjera në maxhorancë. Shpresoj që kjo lëvizje edhe brenda maxhorancës, të përkrahet edhe nga ana e Partisë Demokratike. Megjithatë dëshiroj të shpreh pesimizmin tim që pasi arrihet një kompromis në konferencën e kryetarëve kemi daljen e kryeministrit i cili heq çdo shpresë për kompromis të mëtejshëm. Kemi dy qëndrime në fakt: Unë nuk dua që të aludoj për më tepër, por mendoj që ndryshe është atmosfera kur diskutohet në parlament dhe ndryshe është pastaj kur përfshihen përfaqësues të qeverisë në të. Kam parasysh këtu edhe iniciativën e fundit, e cila është kundër iniciativës të opozitës, që është ndërmarrë nga ana e ministrit të transporteve.

Zëri i Amerikës: Zoti Topi, e djathta ka shprehur qëndrime kontradiktore për rregulloren. Ju si kryetar i grupit parlamentar a mund të na thoni qartë nëse jeni të gatshëm për ndryshimin e saj dhe a ka në të vërtetë një mospërputhje mes qëndrimeve të grupit tuaj parlamentar dhe qëndrimit të shprehur nga qeveria?

Bamir Topi: Unë në emër të grupit parlamentar të Partisë Demokratike jam shprehur jo vetëm në seancë plenare, por edhe në takime të kryetarëve të grupeve parlamentare që jemi të hapur të pranojmë iniciativën e ndërmarrë nga një grupn deputetësh të spektrit të majtë për ta futur në kalendar dhe e vërteta është që kjo iniciativë është në kalendarin e punimeve të Kuvendit dhe të gjithë së bashku kemi rënë dakord që meqenëse bëhet fjalë për natyrë proceduriale gjithçka t’i kalojë komisionit specifik për mandatet dhe rregulloren dhe çdo aludim dhe paragjykim për mënyrën e zgjidhjes së problemit do të ishte i gabuar. Përderisa të gjithë kemi pranuar që ky komision duhet të fillojë dhe për ta diskutuar, besoj që të gjithë duhet të presim se çfarë do të thotë ky komision tek e fundit. Përsa u përket mendimeve të ndryshme që ekzistojnë në maxhorancë edhe për këtë problem, është e natyrshme që çdo grup parlamentar ka të drejtën për të prezantuar idetë e veta rreth një problemi të caktuar dhe këtë ne e shikojmë si një pjesë e funksionimit normal të marrëdhënieve në demokraci. Fakti që zoti Ndoka ka paraqitur një amendament, fakti që zoti Basha ka paraqitur një amendament tjetër, nuk i takon të shprehemi paraprakisht, para se të shprehet komisioni të cilit ne i kemi dhënë mandatin për ta shqyrtuar.

Zëri i Amerikës: Partia Socaliste duket si një forcë politike pa një drejtim të qartë ku figura të ndryshme dalin me mesazhe të ndryshme, ndonjëherë edhe kontradiktore. Vëzhguesit thonë se ky është një nga elementët kryesorë që ka ndikuar në qëndrimet jokonstruktive të kësaj partie. Si u përgjigjeni këtyre kritikave?

Pandeli Majko: Ne jemi partia e parë në historinë e Shqipërisë që e kemi ndërruar liderin duke e pasur atë gjallë, kështuqë mendoj që njerëzit duhet të mësohen pikërisht me këtë fakt që ne jemi në një mënyrë normale, por të re për kulturën politike të shqiptarëve të trajtimit të lidershipit nga ana e Partisë Socialiste. Përsa i përket faktit që janë shprehur mënyra të ndryshme të të thënit të gjërave. Mendoj se kjo nuk ka pasur të bëjë fare me vendim-marrjen e Partisë Socialiste. Përsa i përket vendimeve që kemi marrë ne jemi absolutisht të gjithë në një rresht. Për më tepër nuk bëhet fjalë për ndonjë histori ndarjesh, apo krizash brenda Partisë Socialiste. Për momentin, ju e shikoni që e gjithë opozita është duke e trajtuar njëlloj të gjithë momentin politik që po kalon qoftë parlamenti, qoftë klasa politike shqiptare. Sigurisht që ka analistë që përpiqen të fetishizojnë çdo zë i cili flet ndryshe nga Kryetari i Partisë, apo Sekretari i Përgjithshëm. Nëqoftëse koloriti brenda një partie politike keqkuptohet, ky është një problem i analistëve, jo i Partisë Socialiste. Unë mund t’ju konfirmoj se vendim-marrja tek ne nuk ka munguar dhe nuk do të mungojë.

Zëri i Amerikës: Zoti Topi, duket se këto përplasje kanë lënë në hije çështjen e reformës zgjedhore, ndërkohë që afrohen zgjedhjet lokale. Pse është bllokuar puna në këtë drejtim?

Bamir Topi: Ka një parim klasik në matematikë që përpara se të bësh veprimet midis kllapave, duhet të bësh veprimet brenda kllapës. Përderisa brenda kllapës të spektrit të majtë ka mjaft probleme dhe në këndvështrimin tim ka një krizë të vërtetë të identitetit, çka presupozohet edhe në mendimet e analistëve të ndryshëm, e çon këtë parti në një paaftësi, apo një sufiçencë për të trajtuar problemet madhore që janë jashtë interesit të ngushtë. Unë edhe një herë e trajtoj me shumë shqetësim problemi e reformës zgjedhore e cila ka qenë një angazhim i të gjitha partive politike parlamentare për të filluar nga puna. Po përsa kohë aty në parlament njerëzit tentojnë të merren me gjëra sipërfaqësore, duke e lënë reformën zgjedhore, tregon që ne si parlamentarë largohemi nga çështje esenciale që shqetësojnë jo vetëm shoqërinë shqiptare, por institucionet qoftë kombëtare, qoftë ndërkombëtare.

Zëri i Amerikës: Zoti Majko, cila është përgjigjia juaj? A kanë të bëjnë problemet brenda Partisë Socialiste me ngecjen e reformës zgjedhor? Partia juaj nuk e ka ngritur më këtë shqetësim aq shumë. Pse?

Pandeli Majko: Ta zëmë se do të ishte kështu. Esencialisht do të ishte qesharake. Mendoj se nuk bëhet fjalë për ndonjë krizë brenda Partisë Socialiste që po reflekton në mungesën e reformës zgjedhore, apo në mungesën e trajtimit të problemit të legalizimeve, apo të ish-pronarëve, apo të mungesës së energjisë elektrike në disa zona, apo në rregullimin e rrugëve. Besoj që duhet ta kuptoni që në këto momente opozita shqiptare po flet me një gojë për krizën që ekziston aktualisht në parlament. Por nëse dikush mendon se krizën duhet ta kërkojë tek Partia Socialiste, ne jemi mësuar me lloj-lloj historish në këtë drejtim dhe nuk na bën ndonjë përshtypje. Ajo që do të bënte përshtypje në këto momente do të ishte nëse brenda Partisë Socialiste do të kishte heshtje, ose mungesë debatesh. Kjo nuk ndodh që gjë do të thotë se gjithçka shkon në rregull. Që nga dita e krijimit të Partisë Socialiste ne kemi patur debate. Ajo që dua të them është se bashkë me të gjithë opozitën ne duam t’i japim një zgjidhje kësaj krize. Duam të dëgjojmë një vullnet të shprehur politik. Kriza në Shqipëri, në parlamentin shqiptar tanimë është politike. Ne presim një vendim politik nga ana e Partisë Demokratike, sepse nga ana e partive të vogla në koalicion me Partinë Demokratike pothuajse e kemi të mbyllur këtë çështje. Ata kanë dhënë OK-in përsa u përket propozimeve të Partisë Socialiste.

Zëri i Amerikës: Zoti Topi, zoti Majko, të dy juve shprehët dëshirën dhe vullnetin për kompromis, për të qetësuar situatën. Atëherë cila është pika e përbashkët për kompromis dhe pse kjo pengesë kaq e madhe për të konkretizuar atë. Zoti Topi?

Bamir Topi: Unë mendoj që në Parlament funksionohet mbi bazën e një dokumenti, që është kushtetuta e parlamentit: rregullorja e parlamentit. Përderisa kjo rregullore është miratuar kur Partia Socialiste ishte në maxhorancë, unë mendoj që nuk duhet të kishte motiv themelor për ta parë rregullorem me handikape, qoftë edhe për çështjen e votimit, pasi edhe eksperiencat në mbarë botën janë të tilla që edhe sistemi elektronik është pjesë e teknologjisë moderne që garanton fshehtësinë e votës. Gjithsesi përderisa kjo inciativë është futur në Parlament unë mendoj që askush nuk ka të drejtë të shprehet para se komisioni në fjalë ta trajtojë, ta shqyrtojë dhe ta kalojë në seancë plenare. Gjithçka që lidhet me një pozicionim të opozitës për një krizë parlamentare më duket se është më shumë autosugjestive, sepse në parlament përveçse një krize të opozitës, nuk mendoj se ka krizë tjetër. Parlamenti shqiptar kërkon domosdoshmërisht që të merret me problemet madhore që ka Shqipëria dhe ju siguroj sikurse ju e dini që nuk janë pak, janë shumë.

Zëri i Amerikës: Zoti Majko cila është përgjigjia juaj, pasi zoti Topi shprehu vullnetin për zgjidhjen e bllokimit?

Pandeli Majko: Dëshiroj të them që kam respekt të thellë qoftë për zotin Topi si koleg të vjetër, qoftë për grupin parlamentar të Partisë Demokratike. Dëshiroj të them që jam dakord me zotin Topi që rregullorja ekzistuese e parlamentit shqiptar është miratuar me konsensusin e të dyja palëve, kur Partia Socialiste ishte në pushtet. Por unë dëshiroj me shumë respekt t’i them zotit Topi se në dhjetorin e vitit që sapo lamë pas, kur Partia Demokratike ishte në pushtet, është bërë një amendament në këtë rregullore, ku përfaqësuesit e institucioneve kushtetuese mund të hiqen me votim të hapur. Ne nuk po flasim për njerëz që vinë për herë të parë në pushtet. Zotin Berisha e njeh Shqipëria, shqiptarët, e njohin edhe perëndimorët. Po bien këmbanat e një ndryshimi të madh përsa i përket përfaqësuesve të institucioneve kushtetuese. Ne duam kompromis mbi bazën e legjitimitetit, nuk duam kompromis mbi baza të natyrave të tjera. Të heqësh votimin e fshehtë nga salla e parlamentit për ne është dënim i legjitimitetit, jo krizë e opozitës.